Норвегиялик ярим ҳимоячи Мартин Эдегор Лондоннинг "Арсенал" клуби раҳбарияти билан янги меҳнат шартномасини имзолаш бўйича музокаралар олиб бормоқда. Бу ҳақда инсайдер Фабрицио Романо ижтимоий тармоқлар орқали маълум қилди.
Журналист таъкидлаганидек, "канонирлар" келаси ҳафталарда келишувни якунлашни кутишмоқда. Эдегор билан келишувни узайтириш Лондон клубининг бевосита устувор вазифаларидан биридир.
Мартин 2021 йилдан бери "Арсенал"да ўйнамоқда. Ўтган мавсумда скандинавиялик ярим ҳимоячи 45 та ўйин ўтказиб, 15 та гол ва 8 та голли узатмани амалга оширган. Томонлар ўртасидаги амалдаги шартнома 2025 йилда якунига етади.
