Англия Премьер-лигасининг барча даврлардаги энг яхши футболчиларидан тузилган рамзий терма жамоа сунъий онг томонидан танлаб олинди. Chat GPT деб аталмиш маълумотлар базаси ўз танловини қилди. Тузилган жамоада айрим баҳсли танловлар мавжуд бўлиб, айни дамда АПЛда ўнаётган юлдузларнинг ҳеч бири жамоага кира олмаган. Шунингдек, етти бор Англия чемпионига айланган "Манчестер Сити"дан фақатгина битта вакил мавжуд холос. Chat GPT ўз жамоасини 4-3-3 тактик схемаси асосида шакллантирди.
Қизиғи ярим ҳимоя, нисбатан муаммолироқ тузилган. Англия терма жамоаси афсоналари бўлган Фрэнк Лэмпард, Стивен Жеррард ва Пол Скоулзлар сунъий онгнинг танлови бўлди. Бу трио амалда ҳеч қачон бирга ўйнамаган. Жеррард ва Лэмпард бундан мустасно, албатта. Аммо улар бир ҳаракат қилган пайтда Англия асосан муваффақиятсизликка учрарди. Шунингдек, ҳимояда ҳам кутилмаган танлов мавжуд. Чатбот айни дамдаги беш карра Англия чемпиони Кайл Уокернинг ўрнига Гари Невиллни қанот ҳимояси учун маъқул кўрди. Шундай қилиб, "Манчестер Сити"дан фақатгина Венсен Компанигина танлаб олинди холос. Ҳа, ўтмишда Лэмпард ҳам бир мавсум "шаҳарликлар" сафида ҳаракат қилганини унутмаслик лозим.
Компани марказий ҳимояда Жон Терри билан тандем ҳосил қилади. Чап қанотдан эса Террининг клуб ва терма жамоадаги шериги Эшли Коул жой олган. "Манчестер Юнайтед"нинг шонли давридаги афсоналардан бири Питер Шмейхель дарвоза соҳасига танлаб олинган. Ҳужумда эса "қизил иблислар"нинг яна бир вакили Криштиану Роналду ҳаракат қилади. У чап қанотга қўйилган. Ҳужум чизиғининг қолган нуқталарини АПЛнинг энг яхши тўпурари Алан Ширер ҳамда "Арсенал" форварди Тьерри Анри эгаллади.
Chat CHPT захира вариантларини ҳам шакллантирган. Унга кўра, иккинчи дарвозабон Петр Чех бўлади. "МЮ" триоси Фердинанд, Видич ва Яп Стамлар ҳимояни бутунлай ўзгартиришга қодир бўлади. Шунингдек, бу позиция учун Сол Кэмпбелл ва Виржил ван Дейклар ҳам бор. Ярим ҳимоя борасида ҳам бирдай кучли вариантлар берилган. Рой Кин, Патрик Виейра ва Сеск Фабрегаслар захирада қолдирилди. Ҳужумни эса Уэйн Руни, Деннис Бергкамп ҳамда Серхио Агуэролар билан ўзгартириш мумкин.
ИСМАТОВ Ж.
