Angliya Premyer-ligasining barcha davrlardagi eng yaxshi futbolchilaridan tuzilgan ramziy terma jamoa sun’iy ong tomonidan tanlab olindi. Chat GPT deb atalmish ma’lumotlar bazasi o‘z tanlovini qildi. Tuzilgan jamoada ayrim bahsli tanlovlar mavjud bo‘lib, ayni damda APLda o‘nayotgan yulduzlarning hech biri jamoaga kira olmagan. Shuningdek, yetti bor Angliya chempioniga aylangan "Manchester Siti"dan faqatgina bitta vakil mavjud xolos. Chat GPT o‘z jamoasini 4-3-3 taktik sxemasi asosida shakllantirdi.
Qizig‘i yarim himoya, nisbatan muammoliroq tuzilgan. Angliya terma jamoasi afsonalari bo‘lgan Frenk Lempard, Stiven Jerrard va Pol Skoulzlar sun’iy ongning tanlovi bo‘ldi. Bu trio amalda hech qachon birga o‘ynamagan. Jerrard va Lempard bundan mustasno, albatta. Ammo ular bir harakat qilgan paytda Angliya asosan muvaffaqiyatsizlikka uchrardi. Shuningdek, himoyada ham kutilmagan tanlov mavjud. Chatbot ayni damdagi besh karra Angliya chempioni Kayl Uokerning o‘rniga Gari Nevillni qanot himoyasi uchun ma’qul ko‘rdi. Shunday qilib, "Manchester Siti"dan faqatgina Vensen Kompanigina tanlab olindi xolos. Ha, o‘tmishda Lempard ham bir mavsum "shaharliklar" safida harakat qilganini unutmaslik lozim.
Kompani markaziy himoyada Jon Terri bilan tandem hosil qiladi. Chap qanotdan esa Terrining klub va terma jamoadagi sherigi Eshli Koul joy olgan. "Manchester Yunayted"ning shonli davridagi afsonalardan biri Piter Shmeyxel darvoza sohasiga tanlab olingan. Hujumda esa "qizil iblislar"ning yana bir vakili Krishtianu Ronaldu harakat qiladi. U chap qanotga qo‘yilgan. Hujum chizig‘ining qolgan nuqtalarini APLning eng yaxshi to‘purari Alan Shirer hamda "Arsenal" forvardi Tyerri Anri egalladi.
Chat CHPT zaxira variantlarini ham shakllantirgan. Unga ko‘ra, ikkinchi darvozabon Petr Chex bo‘ladi. "MYU" triosi Ferdinand, Vidich va Yap Stamlar himoyani butunlay o‘zgartirishga qodir bo‘ladi. Shuningdek, bu pozisiya uchun Sol Kempbell va Virjil van Deyklar ham bor. Yarim himoya borasida ham birday kuchli variantlar berilgan. Roy Kin, Patrik Viyeyra va Sesk Fabregaslar zaxirada qoldirildi. Hujumni esa Ueyn Runi, Dennis Bergkamp hamda Serxio Aguerolar bilan o‘zgartirish mumkin.
ISMATOV J.
