«Наполи»нинг ҳужумкор ярим ҳимоячиси Хвича Кварацхелия яқин вақт ичида клуб билан ҳамкорликни узайтириши мумкин.
Corriere dello Sport хабарига кўра, грузиялик футболчининг агенти янги шартнома шартларини муҳокама қилиш учун аллақачон Неаполга етиб борган.
Агентнинг асосий мақсади Кварацхелиянинг маошини ошириш бўлади. Футболчининг ҳозирги маоши йилига 1,4 миллион еврони ташкил қилади.
Хвича ўтган ёзда Неапол клубига келиб қўшилган ва у билан А Серия чемпионига айланганди.
Грузияликнинг «Наполи» билан амалдаги шартномаси 2027 йилнинг июнь ойи охиригача тузилган. Ярим ҳимоячининг трансфер нархи 85 миллион еврога баҳоланмоқда.
