Бугун "Бунёдкор" клуби "Пахтакор" марказий стадионида мезбонларга қарши Ўзбекистон кубоги ярим финал босқичининг жавоб учрашувини ўтказди ва ғалабага эришиб, финал йўлланмасини қўлга киритди.
Бу ўйинда икки жамоа мухлислари турли секторларга жойлаштирилишди. "Пахтакор" ишқибозлар клуби ўзига тегишли марказий секторда жамоани қўллаб-қувватлашган бўлса, меҳмонлар мухлислари дарвоза ортидаги секторда ўтиришди.
"Бунёдкор" мухлислари ушбу ўйинда "Пахтакор"ни чемпионлик билан қутлаб, баннер кўтаришди. "Пахтакор"ни чемпионлик билан табриклаймиз!", деган сўзлар ёзилганди баннерда.
Ўйин сўнгида "Бунёдкор" футболчилари ўз фан-клубига яқинига бориб, уларга миннатдорчилик билдирди.
