Айни дақиқаларда ОФКнинг Профессионал футбол қўмитасининг йиғилиши бўлиб ўтмоқда ва унда бир қатор масалалар кўриб чиқилмоқда. Йиғилишда Ўзбекистондан ЎзПФЛ директори Фарҳод Магометов, "Пахтакор" вице-президенти Самвел Бабаян ҳамда ОФК ходими Алишер Никимбаев иштирок этмоқда.

Алишер Никимбаевнинг маълум қилишича, ОЧЛ мусобақасини ташкил қилиш бўйича 2та муҳим қарор қабул қилинди.

1. Гуруҳ босқичининг сўнгги тур ўйини бир вақтда бошланадиган бўлди. Бу ўйинларнинг қизиқарлигини таъминлайди.

2. Нимчорак финалнинг дастлабки ўйини гуруҳда иккинчи ўринни эгаллаган жамоа майдонида ўтадиган бўлди. Хабарингиз бор, 2013 йилдан бошлаб 1/8 финал ўйини битта эмас, иккита ўйиндан иборат бўлади.

Шунингдек, финал баҳси финалчилардан бирининг майдонида ўтказилишда давом этадиган бўлди.