"Челси" бош мураббийи Маурисио Почеттино "Манчестер Сити" ярим ҳимоячиси Коул Палмер жамоага ўтиши мумкинлиги ҳақидаги хабарларга муносабат билдирди.
Чоршанба куни эълон қилинган маълумотларга кўра, "кўклар" "шаҳарликлар" билан 21 ёшли футболчининг трансфер шартларини келишиб олишган. Ушбу трансфер бонусларни ҳисобга олган ҳолда 50 миллион евродан кўпроққа баҳоланган ва инглиз футболчиси пайшанба куни тиббий кўрикдан ўтиши керак.
"Челси" Лига кубоги баҳсида "Уимблдон"ни мағлуб этганидан сўнг (2:1) журналистлар Почеттинодан Палмер ҳақида сўрашди: "Айни дамда мен ҳеч нарса билмайман. Бизга тегишли бўлмаган футболчилар ҳақида гапира олмайман. Клуб бу ҳақда ҳеч нарса демади. Бу ёзда бошқа биров билан шартнома имзолаймизми? Балки", - деди аргентиналик мутахассис.
