"ПСЖ" ҳужумчиси Уго Экитике ва унинг агентлари Рандал Коло-Муанининг трансферини деярли издан чиқариб юбориши билан клуб президенти Носир Ал-Хелайфининг ғазабини қўзғатди. Бу ҳақда L'Equipe нашрига асосланиб, Footmercato хабар бермоқда.
Экитике Коло-Муанини "Айнтрахт"дан "ПСЖ"га ўтказиш бўйича келишувнинг муҳим қисми бўлиши керак эди, чунки немис клуби трансфер ойнаси ёпилишида унинг ўрнига ўринбосар топмасдан муҳим футболчини қўйиб юборишдан бош тортди. Шунга қарамай, Экитике ва унинг агентлари бу вариантни блоклаб қўйишди - ҳужумчини Бундеслигада ўйнаш қизиқтирмади. Бундан ташқари, футболчи вакилларининг сўзларига кўра, "Айнтрахт"нинг Экитикега бўлган талаби кўпроқ Коло-Муани нархини ошириш усулига ўхшарди.
Олдинроқ Экитике Англиянинг "Вест Хэм" ва "Кристал Пэлас" клубларидан воз кечиб, Парижда қолиш учун ҳамма нарсани қилганди. Франция оммавий ахборот воситалари Угонинг Ал-Хелайфий билан жанжалидан кейин парижликлар таркибида жуда кам ўйин дақиқалари олишига ишонмоқда.
21 ёшли Экитике жорий мавсумда "ПСЖ" сафида Лига 1да 8 дақиқа ҳаракат қилди.
