Футзал бўйича Ўзбекистон Кубоги биринчи босқич «Ғарб» минтақаси ўйинлари якунига етди. Унга кўра, Бухоро вилоятининг «Когон» ҳамда Навоий вилоятининг «Строитель-Зарафшон» клублари финал босқичи йўлланмасини қўлга киритишди.

26-27 ноябрь кунлари Навоий вилоятининг Зарафшон шаҳрида бўлиб ўтган Ўзбекистон Кубоги биринчи босқич «Ғарб» минтақаси баҳсларида Бухоро вилоятининг «Когон», Навоий вилоятининг «Строитель-Зарафшон» ва ҳамда Самарқанднинг «Нафис» жамоалари иштирок этишди.

«Когон» ҳар иккала рақибга қарши ўйинларда ғалаба қозонди –«Нафис» 7:3 ҳисобида мағлуб этилган бўлса, «Строитель-Зарафшон»нинг 3та голига 5та гол билан жавоб берилди. «Нафис» ва «Строитель-Зарафшон» ўртасидаги ўйинда 6:6 ҳисобида дуранг натижа қайд этилгани сабаб, финал босқичига ким йўл олишини «Когон»нинг урган голлари ҳал қилди ва бу борада зарафшонлик футзалчилар омадлироқ чиқишди.

Ўзбекистон Кубоги биринчи босқич «Шарқ» минтақаси ўйинлари 2013 йилнинг февраль ойида Тошкентда ўтказилади ва унда етти клуб –Тошкентнинг «Ардус», «Локомотив», «Бунёдкор», «Пахтакор», Чирчиқнинг «Максам-Чирчиқ», Андижоннинг «Турон-С» ҳамда Сирдарё вилоятининг «Гулистон» жамоалари иштирок этади. Мусобақалар якунига кўра, 6 жамоа финал босқичи йўлланмасини қўлга киритади.

Финал босқичида 8 жамоа иштирок этади ва ўйинлар плей-офф тизимида (чорак финал, ярим финал ва финал) ўтказилади.

Маълумот ўрнида, футзал бўйича Ўзбекистон Кубогининг амалдаги соҳиби Тошкентнинг «Бунёдкор» клуби ҳисобланади.

Футзал бўйича Ўзбекистон Кубоги-2012/2013
Биринчи босқич, «Ғарб» минтақаси
26 ноябрь, душанба
«Когон» – «Нафис» 7:3
«Нафис» – «Строитель-Зарафшон» 6:6

27 ноябрь, сешанба
«Строитель-Зарафшон» - «Когон» 3:5