"Рома" бош мураббийи Жозе Моуриньо Европа лигаси финалини бошқарган инглиз ҳаками Энтони Тэйлорни ҳақорат қилгани учун УЕФА томонидан тўрт ўйинга дисквалификация қилинди. Португалиялик мутахассис бу ҳолатга янги изоҳ беришни истамаяпти.
"Агар чиндан ҳам ўйлаётган фикримни айтсам, мени 10 та ўйинга дисквалификация қилишади", — деди Моуриньо Futbol Italian билан суҳбатда.
Эслатиб ўтамиз, Европа лигаси финал учрашувида "Рома" "Севилья"га пенальтилар сериясида мағлуб бўлганди. Жозе Моуриньо учун бу бутун мураббийлик фаолиятидаги еврокубок финалидаги илк мағлубият бўлди.
Дисквалификация туфайли Моуриньо Европа лигаси гуруҳ босқичининг 4 турини трибунада ўтказади.
