Украина футбол ассоциацияси (УФА) билан боғлиқ коррупция можаросининг янги тафсилотлари тўпланмоқда.

УФА бош прокурори Юрий Записоцкий эҳтиёт чорасини узайтириш бўйича ишни кўриб чиқиш чоғида Украинадаги профессионал футболдаги ҳакамлик тизимининг собиқ куратори Пьерлуиджи Коллинага пул тўлангани айтилаётган ҳужжатларни тақдим этди. Football Hub нашри маълумотларига кўра, қоғозларда афсонавий ҳакамнинг сохта имзоси пайдо бўлганига барча белгилар мавжуд.

"2015 йилнинг 18 июнида март ойидан бери Андрий Павелко раҳбарлик қилган ўша пайтдаги УФА Украина ҳакамлик тизими куратори Коллина билан янги шартнома имзолади. Бироқ 2015 йилнинг 1 июлида қўшимча келишув имзоланиб, унга кўра Коллинанинг маоши 678 минг еврога оширилган. Ва бу ерда шунчаки мия портлаши мумкин: ушбу икки шартномада Коллинанинг имзолари тубдан фарқ қилади! 2015 йил 1 июлдаги қўшимча келишувга кўра, Коллинанинг имзоси унинг ҳақиқий имзосига умуман ўхшамайди", — дейилади нашрда.