"Атлетико" ҳимоячиси Науэль Молинанинг янги шартномаси бўйича товон пули миқдори маълум.
Журналист Маттео Мореттонинг сўзларига кўра, жаҳон чемпиони хизматларига қизиқаётган клублар 100 миллион евро тўлаши мумкин, бу аввалроқ хабар қилинганидан 30 миллион еврога кўп. Маълумки, "матрасчилар" раҳбарияти аргентиналик билан хайрлашмоқчи эмас.
Эслатиб ўтамиз, Молина ўтган йилнинг июль ойидан бери "Атлетико"да ўйнамоқда. Унинг ҳисобида испан гранди либосида 44 та ўйин ва 5 та гол бор. Transfermarkt портали 25 ёшли футболчининг нархини 35 миллион еврога баҳоламоқда.