Осиё чемпионлар лигаси ғолибига айланган «Ульсан Хёндэ» клуби кейинги мавсумга ҳозирги таркибини сақлаб қолиши қийинга ўхшамоқда. Ҳар холда, Жанубий Корея ОАВлари бераётган хабарларга таянадиган бўлсак, клубнинг бир нечта футболчиларига Европа ва араб мамлакатлари жамоаларидан «севги қўнғироқлари» бўлиб турибди.

Хусусан, мавсумни юқори нотада ўтказган «Ульсан» сардори ва Жанубий Корея терма жамоасининг асосий ҳимоячиси Квак Тэ Хвига  Саудия Арабистонининг «Аш-Шабоб» клуби жиддий қизиқиб қолган. Саудия Арабистони жамоаси корейс ҳимоячиси трансфери учун 2 миллион доллар тўлашга тайёр ва йилига 3 миллион долларлик узоқ муддатли шартнома таклиф этмоқда.

Клублар ўртасидаги жаҳон чемпионати якунлангач, барча масалага ойдинлик киритилиши кутилмоқда. Ульсанликлар билан 1 йиллик шартномаси қолган Квак Тэ Хвининг жамоани тарк этиши аниққа ўхшайди. 31 ёшли ҳимоячи 2005 йили «Сеул» клуби сафида Кей-лигада дебют қилиб, «Чоннам» ва «Ульсан Хёндэ» клубларида ўйнади. Жанубий Корея терма жамоаси сафида 28 ўйинда майдонга тушиб, 5та гол киритган.

Шунингдек, «Ульсан Хёндэ» ва Жанубий Корея терма жамоаси ҳужумчиси Ким Шин Вукка ҳам араб жамоалари оғиз солишмоқда. Аммо ҳужумчининг ўзи Европага кетишни мўлжалламоқда. Сал олдинроқ «Ульсан» ярим ҳимоячилари Ли Хо ва Осиёнинг 2012 йилдаги энг яхши футболчиси бўлган Ли Кеун Хога ҳам бир қанча хориж клубларидан таклифлар тушаётганлиги ҳақида хабарлар тарқалган эди.

Отабек Йўлдошев, Жанубий Корея, Сеул