Лионель Месси ва унинг турмуш ўртоғи Антонелла Роккуццо Майами шаҳрининг Форт Лаундердейл мавзейидан 8.6 миллион фунтлик уй сотиб олди. Аргентиналик суперюлдуз ёзда "Интер Майами" клубига кўчиб ўтганди. 36 ёшли футболчи Майами шаҳрида ҳозирга қадар қиймати 15 миллион фунтга тенг кўчмас мулк сотиб олишга улгурди. Месси у ердаги уйлар сонини кўпайтириш ҳаракатида. Яқиндагина у жуда катта кошона харидини амалга оширди. Сотувчи ва Месси ўртасидаги келишув ўтган душанба куни имзоланган.

Forbes берган маълумотга кўра, Мессининг янги уйи 10 500 квадрат фут жойни эгаллайди. У саккизта ётоқхона, тўққизта душ, учта гараж ва бассейнни ўз ичига олади. Шунингдек, уйда спа, фитнесс зал ҳамда иккита қайиқ ҳам бор. Негаки, уй олдида сув ҳавзаси мавжуд. Энг муҳими унинг жойлашуви "Интер Майами"нинг уй стадионига жуда яқин. Месси номидан кошона харидини унинг яқин ишчилари бўлган Самюель ва Донна Шимпкинлар амалга оширган. Негаки, Месси у пайтда Аргентина термаси билан сафарда эди.

Лионель Мессининг учта ўғли бор. Энди у 35 ёшли хотини Антонелла ва фарзандлари билан янги уйида истиқомат қилади. Ушбу уйнинг йиллик солиқ тўлови 67 минг фунтни ташкил этиши айтилган. Кўчмас мулкнинг ичи худди ташқариси каби ўта ажойиб. Деворлар ўзига хос безатилган бўлиб, улардан бирига эчкининг расми туширилган. Бу эса Мессининг барча даврларнинг энг яхшиси эканини англатади. Хоналарга табиий ёруғлик яхши тушади. Ушбу хонадан жойлашган ҳудудда бундан икки йил олдин рекорд даражада қиммат уй сотиб олинган. Уни таниқли модел Патрик Бет 16.31 миллион фунтга харид қилган.

Жанубий Флориданинг энг қиммат ҳудудди, эндиликда камида яна икки йил Месси ва оиласига макон бўлади. У "Интер Майами" билан 2025 йилга қадар битим имзолаган. "Барселона" афсонасининг маоши йилига 40-48 миллион фунтни ташкил этади. Унинг кўчмас мулклари сони ошиб бормоқда. Энг сўнггиси эса, шубҳасиз санъат асаридир.

ИСМАТОВ Ж.