Австралиянинг Перт шаҳрида бўлиб ўтаётган сув полоси бўйича ёшлар ўртасидаги жаҳон чемпионатида гуруҳ босқичи ўйинлари якунига етиб, ҳал қилувчи ўйинлар бошланди. Афсуски, Ўзбекистон эркаклар ва аёллар терма жамоалари медаллар учун курашиш имкониятидан маҳрум бўлишди.

Эркаклар.
Ёшларимиз гуруҳдан чиқиш учун сўнгги ўйинда Эронни мағлуб этишлари шарт эди. Аммо йигитларимизга тажриба етишмади ва тенгкурашлар остида кечган баҳс 13:10 ҳисобида форслар фойдасига ҳал бўлди.

Ушбу ўйинда ҳам жамоамиз тўпурари Кирилл Рустамов 4та гол уришга муваффақ бўлди. Амир Қурбонбоев рақиб дарвозасини 2 марта ишғол қилган бўлса, Миразиз Қосимов, Егорь Чумаченко, Семён Селифонтов ва Максим Крахоткин ҳисобига биттадан гол ёзилди.

Натижада бешта терма жамоа ўрин олган "С" гуруҳида терма жамоамиз 4-ўринни эгаллашди (1та ғалаба ва 3та мағлубият). Энди ўзбекистонлик йигитлар 13-27-ўринлар учун баҳсларга киришишади. Уларнинг бугунги рақиби "В" гуруҳида 5-ўринни эгаллаган Бразилия терма жамоаси бўлади.

Аёллар.
Ўз гуруҳларида иккинчи ўринни эгаллаган Ўзбекистон ёллар терма жамоаси кеча Бразилия билан чорак финалга чиқиш учун баҳс олиб боришда. Бу ўйинда жанубий америкаликларнинг қўллари баланд келди — 20:4. Анастасия Осипенко 2та гол урган бўлса, Нелья Дадабаева ва Лилия Умаровадан биттадан голга муаллифлик қилишди.

"Илк марта жаҳон чемпионатида иштирок этаётган жамоамизнинг энг яхши ўйинларидан бири бўлди. Бизнинг жамоа жуда ҳам ёш ва Бразилия кучли жамоалардан бири. Бу ўйинда яхши имкониятларга ва вазиятларга эга бўлдик. Насиб қилса, кейинги жаҳон чемпионатида янада яхшироқ иштирок этамиз", дейди терма жамоа аъзоси Елена Духанова.

Энди қизларимиз мусобақанинг 9-12-ўринлари учун баҳсларга киришишади. Бугун Борис Рустамов шогирдларига Италия терма жамоаси рақиб бўлади. Италияликлар нимчорак финалда Россияга ютқазишди (6:10).