Австралиянинг Перт шаҳрида бўлиб ўтаётган сув полоси бўйича ёшлар ўртасидаги жаҳон чемпионатида кеча плей-офф ўйинлари бошланди.

Ўз гуруҳида 4-ўринни эгаллаган эркаклар терма жамоамиз "В" гуруҳида 5-ўринни эгаллаган Жанубий Африка Республикаси жамоаси билан 13-19-ўринлар учун баҳс олиб борди. Ушбу ўйинда вакилларимиз 10:8 ҳисобида ғалаба қозонишди. Голларнинг 4таси Максим Крахотин урган бўлса, Кирилл Рустамов бу сафар ўз ҳисобига 3та гол ёздириб қўйди. Шунингдек, Аббос Сайлиев 2та ва Алексей Зайцев биттадан голга муалифлик қилишди.

Терма жамоамиз бугун 13-16-ўринлар учун Қозоғистон билан баҳс олиб боришади. Ушбу жуфтлик ғолиби эса эртага Миср-Колумбия жуфтлиги ғолиби билан 13-14-ўринлар учун баҳс олиб боради. Мағлуб бўлган жамоалар эса 15-16-ўринларга курашади. Қўшниларимиз "А" гуруҳида 4-ўринни эгаллашганди.

Ўзбекистон қизлар терма жамоаси эса кеча 9-12-ўринлар учун баҳсда Италияга имкониятни бой беришди — 1:22. Вакилларимизнинг ягона гол Лилия Умарова ҳисобига ёзилди.

Қизларимиз бугун тонгда 11-12-ўринлар учун Жанубий Африка Республикаси терма жамоаси билан ўйинда иштирок этишди ва бу ўйинда ҳам мағлуб бўлишди — 4:10. Гол муаллифлари — Лилиф Умарова (2), Валерия Козоловская ва Есения Пифтор. Шундай қилиб, Ўзбекистон қизлар терма жамоаси мусобақада 12-ўринни эгаллади.