Мессининг янги жамоасидаги таъсири жуда катта бўлди. Буни "Интер Майами"нинг олдинги ва ҳозирги натижаларини таққослаш орқали ҳам кўришимиз мумкин. Хусусан, Лионель Месси келгунига қадар ҳар қандай ўлчовлар бобида Дэвид Бекхэм жамоаси энг ёмон натижага эга эди. Шарқий лиганинг энг пастида тургани етмаганидек, жамоа бош мураббийсиз қолганди. Негаки, қониқарсиз натижалар сабабли Фил Невилл истеъфога чиқарилган эди.
Месси "ПСЖ"ни шартномаси якунлангач, тарк этди. Бу орада унинг "Барселона"га қайтиши, Саудия Арабистонига йирик битим эвазига кетиши билан боғлиқ миш-мишлар урчий бошлади. Аммо у МЛСни танлади. Айни дамда 36 ёшли афсона "Олтин тўп"га энг асосий даъвогар бўлиб турибди.

Месси июль ойи охирида узоқ кутилган дебютини амалга ошириб, сўнгги дақиқалардаги голи эвазига жамоасига ғалаба келтирди. Шундан бери ҳужумчи Тато Мартино бошчилигида "Интер Майами"нинг натижаларида кескин яхши томонга ўзгартирди. Бунда Мессига эски дўстлари бўлмиш Хорди Алба ҳамда Серхио Бускетс ёрдам беряпти. Масалан, Месси ўзи қатнашган ҳар бир ўйиндаги голда иштирок этмоқда. У билан "Интер Майами" ҳали мағлубиятга учрамади. Айнан Месси сабабли клуб ўз тарихида илк бор титул қўлга киритди.

Жамоа бош мураббийи Тата Мартино Месси ҳақида шундай дейди: "Мессини дунёнинг энг яхши футболчиси эканини ҳамма билади. Бундан яхшироқ таъриф ишлатиш имконсиз бўлса керак. Мен унинг меҳнатларини қадрлайман".
Қуйида Месси в усиз "Интер Майами" қандай статистикага эга эканини билиб оласиз.

Месси билан

Ўйинлар: 11 та
Ғалабалар: 10 та (3 таси пенальтилар серияси орқали)
Дуранглар: 1 та
Мағлубиятлар: 0 та
Голлар: 30 та (11 та гол ва 5 та ассист Мессиники)
Ғалаба кўрсаткичи: 90.9 фоиз
Ўртача очко: 2.81.

Мессисиз

Ўйинлар: 28 та
Ғалабалар: 10 та (1 таси пенальтилар серияси орқали)
Дуранглар: 1 та
Мағлубиятлар: 15 та
Голлар: 33 та
Ғалаба кўрсаткичи: 35.7 фоиз
Ўртача очко: 1.17.

ИСМАТОВ Ж.