Саудия Арабистони валиаҳд шаҳзодаси Муҳаммад бин Салмон “спортдаги кирдикорлар” деб аталмиш айбловларга жавоб берди.
Инглизча "Sportswashing" атамаси мамлакат ёки компания спорт ютуқлари орқали ўз обрўсини оширишга ҳаракат қилганда қўлланилади. Футбол ривожига катта миқдорда сармоя киритган Саудия Арабистони ҳукумати айнан шу нарсада айбланмоқда.
"Агар "спортдаги кирдикорлар" деб аталадиган нарса менинг мамлакатим ялпи ички маҳсулотини 1 фоизга оширса, биз "спортдаги кирдикорлар" билан шуғулланишни давом эттирамиз. Менга атама қизиқ эмас. Спорт туфайли ЯИМ ўсиши 1 фоизни ташкил этди ва мен уни 1,5 фоизга оширишни мақсад қилганман. Буни хоҳлаганингизча номланг, лекин биз бу 1,5 фоизни оламиз" - дея бин Салмоннинг сўзларидан иқтибос келтирмоқда Foot Mercato нашри.
Саудия Арабистони иқтисодиётни диверсификация қилиш мақсадида 2017 йилдан буён спортга сармояни оширишга қарор қилди. Лойиҳа мамлакатнинг халқаро миқёсдаги нуфузини оширишга ҳам мўлжалланган, деб ишонилади. Бу ёзда бир қанча футбол юлдузлари маҳаллий футбол лигасига қўшилишди; ўтган ёзда Саудия клублари трансферлар учун жами 954,3 миллион евро сарфлаган.
