Saudiya Arabistoni valiahd shahzodasi Muhammad bin Salmon “sportdagi kirdikorlar” deb atalmish ayblovlarga javob berdi.
Inglizcha "Sportswashing" atamasi mamlakat yoki kompaniya sport yutuqlari orqali o‘z obro‘sini oshirishga harakat qilganda qo‘llaniladi. Futbol rivojiga katta miqdorda sarmoya kiritgan Saudiya Arabistoni hukumati aynan shu narsada ayblanmoqda.
"Agar "sportdagi kirdikorlar" deb ataladigan narsa mening mamlakatim yalpi ichki mahsulotini 1 foizga oshirsa, biz "sportdagi kirdikorlar" bilan shug‘ullanishni davom ettiramiz. Menga atama qiziq emas. Sport tufayli YAIM o‘sishi 1 foizni tashkil etdi va men uni 1,5 foizga oshirishni maqsad qilganman. Buni xohlaganingizcha nomlang, lekin biz bu 1,5 foizni olamiz" - deya bin Salmonning so‘zlaridan iqtibos keltirmoqda Foot Mercato nashri.
Saudiya Arabistoni iqtisodiyotni diversifikasiya qilish maqsadida 2017 yildan buyon sportga sarmoyani oshirishga qaror qildi. Loyiha mamlakatning xalqaro miqyosdagi nufuzini oshirishga ham mo‘ljallangan, deb ishoniladi. Bu yozda bir qancha futbol yulduzlari mahalliy futbol ligasiga qo‘shilishdi; o‘tgan yozda Saudiya klublari transferlar uchun jami 954,3 million yevro sarflagan.
