Оле Гунар Сульшернинг "Манчестер Юнайтед"даги мураббийлик даври ўта омадсиз ва дилҳиралик билан якунланди. Аммо, агарда раҳбарият норвегиялик мутахассис хоҳлаган бешта футболчини олиб берганида, воқеалар бошқача ривожланиши мумкин эди. 2018 йилда Жозе Моуриньо ўрнига келгач, Сульшер ажойиб натижаларга эришади ва раҳбарият ишончини қозонади. Натижада, унга доимий иш таклиф этишади. Афсуски, орадан икки йил ўтгач, ҳаммаси ёмон тугади. Сульшер яқиндагина берган интервьюсида ўзи сотиб олишни истаган футболчиларни очиқлади. Қуйида уларнинг номи ва қаёққа кетганини билиб оласиз.
Эрлинг Холанд
Сульшер бу борада шундай деган: "Афсуски, биз билан бир даврда ўйнамадик. Бизни пайтда "Арсенал" ва "Челси" асосий рақиблар эди. Ҳозир кўп жамоаларда етарлича пул бор. "МЮ" ўз даврида Роналду ва Рунини сотиб ола билган. Ҳозир эса улар, ҳаттоки Эван Фергюсонга таклиф билдира олмайди. Негаки, футболчи бу ерга келишни истамаяпти. Мен мураббий бўлган даврда ҳам бир қанча футболчиларни сотиб ола билмаганимдан афсусланаман. Шулардан бири Холанддир". Эрлинг Холанд ҳозир қаерда ва нималар қилаётганини яхши биласиз.
Харри Кейн
Кейн ўтган мавсумда, "Тоттенхэм"нинг энг муваффақиятсиз мавсумларидан бирида ҳам 30 та голга муаллифлик қилди. Шундай экан, Сульшер уни сотиб олишни истагани табиийдир. Афсуски, ўша пайтда "МЮ" молиявий қийинчиликларга дуч келган. Айни дамда Харри Кейн "Бавария" билан ва ажойиб старт намойиш этмоқда.
Жуд Беллингем
Беллингем Чемпионшипни ёндириб юрган пайтларида бор-йўғи 16 ёш эди. Шу орқали собиқ "Бирмингем Сити" футболчиси Европанинг топ клублари назарига тушади. 2020 йилда "МЮ" Беллингем учун жиддий курашга киришади. Ёш футболчи ота-онаси билан Каррингтонга келиб, турда иштирок этган. Ҳатто, Сульшер, Сер Алекс Фергюсон ва "МЮ" спорт дирекори билан гаплашган. Шунга қарамай, Жуд Германияга кетишни танлади ва бу танлов тўғри бўлгани ҳозир ўз исботини топмоқда.
Мойсес Кайседо
Сульшер Кайседони Эквадордан олиб келишга ҳаракат қилган. Бу борада шундай дейди: "Биз Кайседо масаласини муҳокама қилдик. Аммо бизга АПЛ учун тайёр футболчи керак эди. "Брайтон" эса четдан футболчи олиб келиб, уларни бирор йил ичида юлдузга айлантиришда устаси фаранг жамоа. "МЮ"да эса бундай эмас. 2020 йилнинг январида Кайседо ўрнига Бруну Фернандеш сотиб олинганди.
Деклан Райс
Райс 2021 йилнинг ёзига қадар "Вест Хэм" ва Англия билан нималарга қодир эканини исботлай олганди. "МЮ" эса унга даъво қила бошлайди. Аммо раҳбарият Райс масаласини бир йил кейинга қолдириб, унинг ўрнига Роналду, Варан ва Санчони сотиб олди. 2022 йилнинг ёзига қадар Сульшер ишдан кетди. "МЮ" эса Райс ўрнига Каземирони сотиб олди. Сульшер фикрича, агарда вақтида харид қилинганида, Райс "МЮ"га 100 миллион фунтга тушмасди. "Арсенал" эса уни 105 миллионга сотиб олди.
ИСМАТОВ Ж.
