ФИФАнинг этика бўйича тафтиш комиссияси раиси Майкл Гарсия 4 декабрь куни Муҳаммад бин Ҳаммам иши бўйича суриштирув ишлари якунланганини маълум қилди ва бу борадаги ҳисоботни экспертиза учун ФИФА арбитраж палатасига топширди. Шунингдек, барча ҳужжатлар суд раиси Ханс Йоахим Эккертга ҳам тақдим қилинди.

Бундан ташқари, Майкл Гарсия ФИФА Этика кодексининг 83-моддасига кўра, Бин Ҳаммамга нисбатан вақтинчалик чоралар қўлланилишини сўради. Гарсиянинг фикрича, мазкур иш ҳажми анча катта ва мураккаб бўлиб, бу иш бўйича қарор чиқаришга шошилмаслик лозим. Бу иш бўйича якуний суд қарори чиққунига қадар Муҳаммад бин Ҳаммам ҳар қандай футбол фаолиятидан четлатиб турилиши лозимлиги Гарсия томонида суд раисига йўлланган мактубда баён этилган.

Суд раиси Ханс-Йоахим Эккерт ҳисоботни ўрганиб чиқиб, бу иш бўйича якуний қарор чиқаришга ҳали эрта эканини инобатга олди ва Муҳаммад бин Ҳаммамни вақтинчалик футбол фаолиятидан четлатиб туриш ҳақида қарор чиқарди.