Суперлига 19-турида сафарда ОКМКни мағлуб этган “Металлург” клуби бош мураббийи ғалаба сири, тактика, мотивация ва Абдуманнонов ҳақида фикр билдирди.

“Муносиб ва яхши ўйин учун рақибга миннатдорчилик билдираман. Уларда ўхшамади, бизда эса ўхшади. ОКМК мухлисларига ўйин манзур келмагани аниқ, аммо, нейтрал мухлислар учун қизиқарли ўйин бўлди. Бизга бу ғалаба жуда керак эди. Рақиб ўйинини таҳлил қилиб чиқдик, уларнинг кучли томонларини ўргандик ва бугун уларни тўхтата олдик”, - деди Стешевич.

“Биринчи таймда чиройли голлар киритдик. Иккинчи таймга ҳам шундай кайфиятда чиққан эдик. Ўйин давомида рақибнинг кўплаб зарбаларини блок қилдик. Кўплаб ҳужумларни тўхтатдик. Икки гол фарқини ушлаб қолдик”.

“ОКМК ва “Металлург” – қандай дерби эканини барчамиз биламиз. Бундай дербилардан футбол фақат ютади”.

“Абдуманнонов айни дамда жамоамиз ёшлари сафида шуғулланмоқда. Нима учун? Бу жамоамизнинг ички сири”.