Кеча эрта тонгдан Жанубий Корея спорт ОАВларининг деярли барчаси «Сувон Самсунг Блювингс» клуби ҳақида ёзмоқда. Гап шундаки, сувонликлар Германиянинг «Кёлн» клубида ўйнаётган Шимолий Корея терма жамоаси хужумчиси Чжонг Тэ Сени сотиб олиш учун музокара столига ўтиришган.
Махаллий матбуот хабарига кўра, сувонликлар Шимолий Кореяда «Халқ Руниси», дея юксак ҳурмат қилинадиган Чжонг Тэ Сенинг трансфери учун 300 минг доллар сарфлаган ҳолда, йилига 500минг долларлик шартнома таклиф этишмоқда. Ушбу трансфер ҳақида фикр билдираркан «Сувон» матбуот хизмати: «Иккала жамоа ҳам ҳозирча трансфер шартларини мухокама қилишмоқда», дея ёзади.
Агар трансфер муваффақиятли амалга ошса Чжонг Тэ Се Кей-лигага қадам босган тўртинчи шимолий кореялик футболчи бўлади. Шу вақтгача Рянг Кю Са («Улсан Хёндэ», 2001 йил), Ким Ёнг Хви («Сеонгнам», 2002 йил), Ан Ёнг Хак («Бусан», 2006 йил) каби футболчилар Кей-лигада тўп суришган. «Сувон» «шимолий кореялик Руни»га катта умид қилаётганлигини яширмаяпти.
Чжонг Тэ Се ОЧЛда «Сувон»нинг осиёлик легионер лимитини тўлдириши кутилмоқда. Шундоқ ҳам Кей-лигадаги энг кучли хужум чизиғига эга бўлган жамоада Чжонг Тэ Се Енан Радончич, Стевица Ристич, Ха Те Гюн, Чо Донг Гон кабилар билан рақобатлашишига тўғри келади. Шунингдек, Кей-лигадан Чжонг Тэ Сега оғиз солганлар рўйхатида «Ульсан Хёнде» ва «Инчхон Юнайтед» ҳам бор. Аммо ҳозирча сувонликларнинг таклифлари аниқроқ янграмоқда.
Келиб чиқиши шимолий кореялик бўлган 28 ёшли Чжонг Тэ Се Японияда туғилган. Илк профессионал клуби Жей-лиганинг «Кавасаки Фронтале» клуби бўлиб, 2006 йили Жей-лигада дебют қилган. Жей-лигадаги ажойиб ўйинларидан кейин ҳатто Япония терма жамоасидан ҳам таклиф тушган бўлса-да, у тарихий ватани термасида ўйнашни афзал билди. Чжонг Тэ Се 2010 йилги жаҳон чемпионатидан кейин Германиянинг «Бохум» клубига кўчиб ўтганди. Ушбу жамоа сафида футболчи Германия 2-бундеслигасида 39 ўйинда 14 марта гол киритишга эришди. Ўтган йили ёзда эса «Кёльн» уни сотиб олди ва Бундеслигада ҳам тўп суришга эришди. Аммо ушбу мавсум жароҳати туфайли «Кёльн»даги ўрнини йўқотиб қўйган футболчи Кей-лигада ўйнаш истаги борлигини бир неча марта таъкидлаб: «Менинг футболчилик ҳаётимда Кей-лига учун алоҳида жой бор.Қачонлардир ушбу чемпионатда тўп суришни истайман,»деган эди.
Отабек Йўлдошев, Жанубий Корея, Сеул
