Италия пойтахти Рим шаҳрида ўтказилган Европа Олимпия қўмиталарининг 41-бош ассамблеясида 2015 йилдан бошлаб ёзги Европа ўйинларини ўтказишга қарор қилинди.

Мазкур йиғилишда илк бор ташкил этиладиган Европа ўйинларига Боку (Озарбойжон) шаҳри мезбонлик қилиши эълон қилинди.

Европа ўйинлари Олимпиада, Осиё ҳамда Панамерика ўйинлари каби ҳар тўрт йилда бир ўтказилади. Ҳозирча мусобақаларни ўтказиш муддати аниқланмаган. Олимпиада ўйинлари дастуридан ўрин олган 28 спорт туридан 15 таси Европа ўйинлари дастурига киритилади. Бундан ташқари Европа ўйинларида Олимпиада ўйинлари дастурига киритилмаган яна икки спорт тури бўйича ҳам мусобақалар ўтказилади. Биринчи бор ўтказиладиган қўҳна қитъа ўйинларида 49 давлатдан 7000 дан 15000 нафаргача спортчиларнинг иштирок этиши кутилмоқда.

Айни пайтга келиб, Европа ўйинлари дастурига киритиладиган 15 та спорт туридан 13 таси аниқ. Булар, волейбол, гандбол, дзюдо, таэквондо (ВТФ), бадминтон, бокс, ўқ отиш, камондан ўқ отиш, байдарка ва каноэда эшкак эшиш, қиличбозлик, стол тенниси, триатлон ва регби-7. Мазкур ўйинлар дастурига, шунингдек, енгил атлетика, эркин ва юнон-рум кураши, сузиш ҳамда гимнастика спорт турларини киритиш борасида ҳам музокаралар олиб борилмоқда.

Олимпиада ўйинлари дастурига киритилмаган икки спорт туридан бири каратэ бўлиши эҳтимоли юқори. Европа ўйинлари дастурига, шунингдек, спорт рақсларини ҳам ўрин эгаллаши тахмин қилинмоқда.

Европа ўйинлари дастуридан ўрин олган спорт турлари 2014 йилнинг март ойида эълон қилинади.

“Ҳозирда мен, Европа олимпия қўмитасининг барча раҳбарлари каби жуда ҳам ҳаяжондаман – дейди ЕОҚ президенти Патрик Хикки. Биз ҳозирда Европа спорти тарихида юз берадиган оламшумул воқеалардан бирининг остонасида турибмиз. Мен биринчи Европа ўйинлари 2015 йили Боку шаҳрида ўтишини фахр билан таъкидлайман”.

Шавкат Жалилов
Маданият ва спорт ишлари вазирлиги матбуот хизмати