"Интер" ҳужумчиси Лаутаро Мартинес "Салернитана"га қарши ўйинда покер қилди.
А Сериянинг 7-туридан ўрин олган учрашувда Милан клуби 4:0 ҳисобида ғалаба қозонди. Барча голлар аргентиналик футболчи ҳисобига ёзилди.
Лаутаро 54-дақиқада Алексис Санчес ўрнига майдонга тушди. 62-дан 89-дақиқагача бўлган даврда у 4та гол урди. Учинчи гол пенальтидан, қолганлари ўйиндан киритилди.
Мартинес А Сериянинг жорий мавсумдаги энг яхши тўпурарлари рўйхатини 9 та гол билан бошқариб турибди. Иккинчи ўринни "Наполи"дан Виктор Осимхен эгаллади (5 гол).
OPTA маълумотларига кўра, Мартинес 1994/95 йилги мавсумдан бери, Италия ғалаба учун уч очко бера бошлаганидан бери захирадан майдонга тушиб, покер қайд этган биринчи футболчидир.
