Кеча ва ўтган кунлари Ғарбий Осиё футбол федерацияси чемпионатида гуруҳ босқичининг 3-тур ўйинлари бўлиб ўтди. Ўзбекистон миллий терма жамоасининг ЖА-2014 саралаш гуруҳидаги рақиблари — Ливан ва Эрон ўз ўйинларини ўтказишди.

"А" гуруҳида иштирок этаётган Ливан миллий терма жамоаси Кувайтга қарши майдонга тушди ва имкониятни бой берди — 1:2. Кувайтликлар — Носсирр (8-дақиқа) ва Хамис (79)нинг голларига ливанлик Атви (61) битта гол билан жавоб қайтарди. Ушбу мағлубиятдан кейин Ливанда энг сўнгги ўринни эгаллади ва мусобақадаги фаолиятини якунлади.

"В" гуруҳи иштирокчиси — Эрон аввалги 2та дурангдан кейин ниҳоят ғалаба қозонди. Форслар Умид Назарий ва Али Каримийнинг голлари эвазига Яман устидан 2:1 ҳисобида ғалаба қозонишди. Мазкур ғалабадан кейин эронликлар 5 очко билан гуруҳда 2-ўринни олишди (1-ўрин Баҳрайнга насиб этди — 7 очко). Аммо бу натижа Эронга ярим финал йўлланмасини бермади. Боиси, ярим финалга фақат гуруҳ ғолиблари ва гуруҳда 2-ўринни эгаллаган жамоалар орасида энг яхши кўрсаткичга эга бўлган 1та жамоа чиқишини инобатга олсак, ЖЧ-2014 йўлидаги рақибимиз йўлланмадан маҳрум бўлиб улгурди.