Ҳозирги кунда "Актобе" клубига қайси мутахассис бош мураббий этиб тайинланиши Қозоғистонда энг кўп муҳокама қилинаётган мавзулардан бири ҳисобланади. Ушбу жамоа сафида 3 нафар юртдошимиз тўп суришини инобатга олганда, бизнинг бу жамоага қизиқишимиз паст эмас. Боз устига, "Актобе"ни Вадим Абрамов бошқариши мумкин деган фикрлар чиқиб турган пайтда...

Вадим Карленовичнинг ўзи бундан бир ҳафта илгари "Актобе"дан ҳеч қандай таклиф бўлмаганини таъкидлаб ўтди. Шунга қарамай, қозоғистонликлар ушбу вариантни ҳам муҳокама қилишмоқда. Жумладан, "Қайрат" клубининг собиқ бош мураббийи Сергей Волгиннинг фикрича, Абрамовнинг Актобега келишидан мухлислар хавотир олишлари керак эмас.

— Билишимча, "Актобе" Ўзбекистон терма жамоасининг учала футболчиси билан шартномага эга, — дейди Волгин. — Шунингдек, Актобега Қозоғистон чемпионатининг энг яхши тўпурари Улуғбек Бақоев келиши мумкинлигини ҳам эшитдим. Вадим Абрамов эса уларнинг барчасини яхши билади. Ўйинчилар билан танишиш ва уларнинг имкониятларин чамалаш учун мураббийга вақт шарт эмас. Боз устига, жамоанинг асоси сақлаб қолинди. Жамоада сардор — Самат Смаков, юқори савиядаги футболчилар — Кенжисариев, Хайруллин, Сидельников бор. Бундай жамоа фақат 1-ўрин учун курашиши лозим. Шунинг учун "Актобе" мухлислари бундан ташвиш чекмасалар ҳам бўлади. Бу жамоа мусобақа жадвалининг юқори қисмида бўлади. Албатта, айрим қийинчиликлар ҳам юзага келиши мумкин. Ахир янги мураббийга мослашиш учун маълум вақт керак бўлади. Шунинг учун Абрамовни таклиф қилиш — "Актобе" учун ёмон вариант эмас.