Аввалроқ “Наполи”да тўп тепган “Торонто” ҳужумчиси Лоренцо Инсинье қишда ҳозирги жамоасини тарк этиб, Италия чемпионатига қайтмоқчи. Бу ҳақда журналист Николо Скира хабар берди.
Манбага кўра, 32 ёшли вингернинг агентлари ўз мижозини Италияга қайтариш вариантларини изламоқда. Қайд этилишича, бундай трансферни амалга ошириш қийин бўлади, чунки Инсинье юқори маош сўрамоқда (мавсумига тахминан 7,5 миллион евро).
Инсинье ўтган ёзда "Наполи"дан эркин агент сифатида "Торонто"га ўтганди. Италиялик футболчи МЛС клуби либосида 32 та ўйин ўтказишга муваффақ бўлди ва у ўйинларда 11 та гол урди ва 6 та голли узатмани амалга оширди.
