«МЮ» мухлислари жамоада фалсафаси унча иш бермаётган бош мураббий Эрик тен Хагдаги физиологик ўзгаришлардан ҳайратдалар.
Ахир нидерландиялик мутахассис атиги 1,5 йил ичида ақлга сиғмас даражада қаригандек. Ҳозир унинг ташқи кўринишидан кўпчилик «шок»ка тушмоқда...
«Олд Траффорд» эгасининг кетма-кет мағлубиятлари ортидан Эрик тен Хаг курсиси анча қимирлаб қолгани - айни ҳақиқат. Оддий айтганда, «МЮ»да катта режа ва истиқболли лойиҳа билан ишга киришган мураббийнинг келажаги сўроқ остида қолмоқда. Ҳа, омадсизликка қарамай, раҳбарият мураббийлар штабини қўллаб-қувватламоқда. Бироқ нидерландиялик мутахассис фаолиятидаги ушбу мураккаб даврни енгиб ўтишда роса қийналаётганини сезмаслик мумкин эмас.
Мухлислар тен Хагнинг «МЮ»да иш бошлаган пайтдаги ва айни кўринишини ўзаро солиштиришди. Икки суратга қарасангиз, Эрик атиги 1,5 йиллик иш давомида анча қаригандек туюлади. Аслида нидерландиялик мураббий олдин ҳам жиддий юз қиёфаси билан машҳур эди, аммо оқарган соқол унинг янги сифатига айланди. Қисқаси, юз ифодасида фарқ жуда катта. Бунга ижтимоий тармоқларда қолдирилаётган изоҳлар ҳам анча қизиқ:
- «МЮ»да тож кийиб юриш осон эмас...
- Ҳозирги футболчилар мураббий талабларини бажаришни истамасалар, клубдан кетишлари керак. Биз сен билан, Эрик.
- Ўзгариш учун Бруну, Рэшфорд, Линделёф ва Далотга раҳмат.
- Ҳозир клубда шундай воқеалар кўзатилмоқдаки, «қизил иблислар»га мухлислик қилиш тобора қийинлашмоқда...
