«Фиорентина» ва Италия терма жамоасининг собиқ футболчиси Марко Наппи А Сериянинг бир нечта машҳур футболчилар иштирок этган пул тикишга оид воқеаларга муносабат билдирди.

«Аввало шуни айтмоқчиманки, булар бутун Италия футболини салбий томонга бурдилар. Даҳшатлиси, бу пул тикиш ҳикояси туфайли футболимиз ҳақида ҳозир бутун дунёда шундай ёмон гаплар кетмоқда.

Италия жамоасининг ўзига келсак, ҳозир ҳам, Англияга қарши муаммога учрамасалар керак, деб ўйлайман.

Бир қатор ўйинчиларсиз ҳам Спалетти ихтиёрида кучли ижрочилар бор. Жаноб Спалетти ажойиб тактик мураббий, у ҳар қандай вазиятга тайёрлана олади.

Балки бу даҳшатли воқеа жамоамизни бирлаштирар ва биз ўзимизни энг яхши томонларимизни кўрсатармиз», - деди Наппи.

Аввалроқ, пул тикиш айбловлари туфайли Сандро Тонали ва Николо Дзаньоло Италия терма жамоасини тарк этганди.