Франция терма жамоаси ҳимоячиси Жан-Клер Тодибо бир дақиқалик сукут пайтида кулиб юборди.
Евро-2024 саралаши доирасидаги Франция ва Нидерландия терма жамоалари ўртасидаги ўйин Аррас шаҳридаги мактабга уюштирилган ҳужумда ҳалок бўлган ўқитувчи хотирасига бир дақиқалик сукут сақлаш билан бошланди. Ҳодиса жума куни ўйин бошланишига бир неча соат қолганида содир бўлган.
Ўйиндан сўнг ижтимоий тармоқларда бутун ўйинни захира ўриндиғида ўтказган “Ницца” ҳимоячиси Жан-Клер Тодибо бир дақиқалик сукутда кулиб тургани акс этган суратлар пайдо бўлди.
RMC Sport журналисти Даниэль Риолонинг сўзларига кўра, Тодибонинг кулишига кимдир уни ҳақорат қилгани сабаб бўлган.
Учрашув французларнинг 2:1 ҳисобидаги ғалабаси билан якунланди ва бу жамоага Евро-2024 га муддатидан аввал йўлланмани тақдим этди.