"Реал Мадрид" Карим Бензема билан хайрлашув ўйинини ташкил қилиши мумкин.
Бензема шу ёзда "Реал"ни тарк этиб, "Ал-Иттиҳод"га ўтди. Франциялик ҳужумчи 14 йилини Мадрид клубида ўтказди.
Marca нашри хабарига кўра, "Реал Мадрид" Бенземани ҳурмат қилиши юзасидан "Сантьяго Бернабеу"да "Ал-Иттиҳод"га қарши ўртоқлик ўйини ўтказишни режалаштирмоқда.
Қайд этилишича, форвард "Реал"даги собиқ ҳамкорлари ва клуб раҳбарияти билан илиқ муносабатда бўлган. Шу билан бирга, Бенземанинг келажакда Европа футболига қайтиш нияти йўқ.
Бензема "Реал Мадрид"даги фаолияти давомида 25 та соврин, жумладан, 5 та Чемпионлар Лигаси кубогини қўлга киритган. 2022 йилда Бензема "Олтин тўп"ни олди.
Франциялик футболчи "Қироллик клуби" сафида 353 та гол урди ва клуб тарихидаги энг яхши тўпурарлар рўйхатида Криштиану Роналдудан кейин иккинчи ўринни эгаллаб турибди.
