Мустақил комиссия "Эвертон"нинг молиявий фейр-плей қоидаларини бузганлиги бўйича интизомий судловни бошлади, деб хабар беради Daily Mail нашри.

Манбага кўра, суд мажлиси 17 октябрь, сешанба куни ёпиқ мажлисда бошланган ва келаси ҳафта якунланади. Премьер-лига бошқа клубларни олдиндан огоҳлантирмасдан кейинги ойда трибунал томонидан чиқарилган ҳукм ва санкцияларни эълон қилади. Агар "Эвертон" айбдор деб топилса, клуб жаримага тортилиши, трансфер тақиқи ёки очколар олиб қўйилиши мумкин.

Қайд этилишича, "Эвертон" ҳар қандай қоидабузарликлар мавжудлигини қатъиян рад этади ва клуб оқланишига ишонади.

Март ойида Премьер-лига "Эвертон"ни молиявий қоидабузарликда гумон қилгани маълум бўлди. Даромадлилик ва барқарор ривожланиш қоидаларининг мумкин бўлган бузилиши 2021/22 йилги мавсумга тегишли.

2023 йилнинг сентябрь ойида "Эвертон" эгаси ўзгарганини эълон қилди. Клубни Американинг 777 Partners инвестиция фонди сотиб олган.