"Манчестер Юнайтед" бош мураббийи Эрик тен Хаг Бруну Фернандеудан янги позицияда фойдаланиш моҳиятини тушунтирди.
Ҳужумнинг ўнг томонида юзага келган кадрлар билан боғлиқ муаммолар туфайли бу мавсумда айрим учрашувларда қанотдаги ўринни марказий ҳужумкор ярим ҳимоячи сифатида ҳаракат қилишга одатланган Фернандеш эгаллайди.
"Баъзида жамоада муаммолар, жумладан, ўйинчиларнинг жароҳатлари пайдо бўлади, улар ечим топишни талаб қилади. Бруну вингер сифатида ўйнашга қодир ва бу ролда жуда эркин. У қанот ўйинчиси учун атипик ўйнайди - у "ўнлик" каби ҳаракат қилади, доимо ўртага ўтади. Бундай ўйинчига ҳар доим жой бўлади, чунки у кўплаб голли вазиятлар яратади", - деди тен Хаг матбуот анжуманида.
