Ўзбекистоннинг амалдаги чемпиони «Пахтакор» вақтинчалик мураббий вазифасини бажариб келган Мурод Исмоиловни клубда бош мураббий сифатида олиб қоладиган бўлди. Ушбу қарорни «Пахтакор» вице-президенти Самвел Бабаян изоҳлаб ўтди.

«Исмоилов жамоамиз тизимида узоқ йиллардан буён самарали меҳнат қилиб келмоқда. У дастлаб академиямизда, кейин эса ёшлар жамоасида яхши меҳнат қилди. Шундан сўнг уни асосий жамоа мураббийлар штабига таклиф қилдик. Ўтган мавсумда эса вақтинчалик бош мураббий вазифасини бажара бошлади».

«Клуб акциядорлари ўтказилган йиғилишда бир овоздан Исмоиловнинг қайд этган натижасидан қониқиш ҳосил қилганларини таъкидлашди. Натижада у энди жамоамизнинг бош мураббийга айланди».

«Исмоилов кўп йиллардан бери клубимизда ишлаб келаётгани боис жамоамиз анъаналарини яхши тушунади. Академия тарбияланувчиларининг асосий таркибга мослашишида бу катта аҳамиятга эга. Умид қиламизки, биз ушбу мутахассис билан ҳали яна кўп муваффақиятларга эришамиз», дея Бабаяннинг сўзларидан иқтибос келтирмоқда клуб расмий сайти.