Исроил ва "ҲАМАС" ўртасидаги урушнинг кескинлашуви натижасида, Ғазо сектори ва Иордан дарёсининг ғарбий соҳилида ўтказиладиган маҳаллий чемпионат ўйинлари 7 октябрь куни тўхтатилган эди. Чегараларнинг ёпилиши туфайли Фаластин терма жамоаси Малайзиядаги "Мердека кубоги"да ҳам қатнаша олмади.
Оқибатда, Фаластин терма жамоасининг ЖЧ-2026 саралашида қатнашиш учун нейтрал майдонга чиқиб кетиши сўроқ остида қолаётган эди. Иордания шаҳзодаси Алининг вазиятга аралашуви натижасида, Фаластин терма жамоаси аъзолари Иорданияга олиб келинди ва шу ерда ЖЧ саралашига тайёргарликни бошлаб юборишди.
Шаҳзода Али Фаластиннинг Австралияга қарши ўйинини ҳам Иорданияда ўтказмоқчи эди. Аммо, яқинда ОФК кубоги доирасидаги "Ал Веҳдат"-"Ал Қаҳраба" ўйини давомида, мезбон мухлислар томонидан Фаластин миллий ҳукумати раиси Маҳмуд Аббас шаънига номақбул ҳайқириқларнинг янграши - Фаластин футбол ассоциациясининг ЖЧ саралаши учун нейтрал майдон сифатида Иорданияни эмас, Қувайтни танлашига туртки бўлди.
Фаластин терма жамоаси Ливанга қарши 1-тур ўйини олдидан, 11 ноябрь куни Саудия Арабистонида Яман терма жамоасига қарши ўртоқлик ўйини ўтказишни режалаштирган.
