"Ювентус" ярим ҳимоячиси Мануэль Локателли клуб билан янги шартнома имзолаш истагини очиқ айтди.
Ҳафта бошида маълум бўлишича, "кекса синьора" раҳбарияти 25 ёшли футболчига 2028 йилгача янги шартнома таклиф қилишга тайёр. Ҳозир Локателлининг ўзи шартнома тузиш нияти ҳақида гапирди: "Мен "Ювентус"да қолмоқчиман, шартномани имкон қадар тезроқ узайтиришга умид қиламан", - дея италиялик ярим ҳимоячининг сўзларидан иқтибос келтиради инсайдер Николо Скира.
Мануэль Локателли 2021 йилдан бошлаб Турин гигантларининг шарафини ҳимоя қилмоқда. Жорий мавсумда футболчи Массимилиано Аллегри жамоасида ўнта ўйин ўтказиб, битта гол ва битта голли узатмага муаллифлик қилган.
