"Ювентус" бошқарувчиси Массимилиано Аллегри жамоанинг мавсумдаги мақсадлари ҳақидаги яна бир саволга жавоб берди.
Туринликлар 97-дақиқада киритилган гол эвазига “Верона” устидан минимал ҳисобда ғалаба қозониб, А Серия турнир жадвалида биринчи ўринга чиқиб олди. Ўн турдан кейин “Ювентус” ҳисобида 23 очко бор, тўққизтадан ўйин ўтказган “Интер” ва “Милан” мос равишда 22 ва 21 очко жамғарган.
“Биз турнир жадвалига қараяпмизми? Ҳа, лекин биз бешинчи ўринни ҳам кузатишимиз керак. Биринчи бўлиш жуда ёқимли, лекин биринчи навбатда бу бизнинг футболчиларимиз учун муҳим – улардан бир нечтаси А Сериянинг юқори поғонасини эгаллаган.
Скудетто орзуми? Сиз доимо бирор нарса ҳақида орзу қилишингиз керак. Биз учун кучли тўртликка кириш муҳим. Охир-оқибат нима бўлишини кўрамиз, лекин биз ҳали ҳам идеалдан йироқмиз, биз фақат ривожланиш жараёнидамиз", - дея Аллегрининг сўзларини келтиради Италия ОАВ.
