“Насаф” жамоасининг икки йилдан бўён асосий дарвозабони бўлган Мурод Зуҳуров янги мавсумда жамоада фаолият олиб бормайдиган бўлди. Бу ҳақда «Воҳа» интернет нашри хабар тарқатмоқда.

Манбанинг хабарларига кўра, Мурод Зуҳуров билан "Насаф" клубининг амалдаги шартномаси ўзаро келишувга мувофиқ бекор қилиниб, эркин агентга айланган. Мурод Зуҳуров бу йилги чемпионатда 19 учрашувда майдонга тушиб, 15та гол ўтказиб юборди. 9 учрашувда эса дарвозамиз даҳлсизлигини сақлаб қолди. Ушбу дарвозабон бундан буён ўзига бошқа жамоа топиши керак бўлади.

Ўзингизга маълумки, "аждарлар" янги мавсумда кўпроқ маҳаллий ёшларга ўз сафидан жой бермоқда. Шунингдек, асосий дарвозабонлик мақомига бер неча давогар ёшлар ҳам бор. Жумладан, Элдорбек Суюнов.

Бундан аввал, "Машъал" жамоаси дарвозабони Санжар Қувватов сайтимиз орқали берган интервьюсида, агар жамоаси янги мавсумда Олий лигада фаолият кўрсатмаса, биронта Олий лигадаги воҳа жамоасига ўтиш хоҳиши борлиги тўғрисида фикр билдириб ўтган эди. Балки янги мавсумда уни "Насаф" сафида кўрармиз. Бу бир мулоҳаза холос.

Шунингдек, мухлислар ўртасида "Насаф"га Темур Жўраевнинг келиши тўғрисида ҳам гап сўзлар бор. "Насаф"нинг дарвозасига энди ким асосий посбонлик қилишини январда ўтказиладиган ўқув-йиғин машғулотларида билиб оламиз.

«Биз мухлисларда Муроднинг 2011 йилдаги ОФК кубоги мусобақаларидаги кўрсатган мазмунли ўйинлари илиқ таасурот қолдирган, айниқса унинг "Насаф"ни ярим финалга чиқишида қўшган катта ҳиссаси ёдимиздан чиқмаса керак», деб ёзади юқорида номи келтирилган манбада.