"Галатасарой"да ижара асосида ўйнаётган Англиянинг "Тоттенхэм" клуби ярим ҳимоячиси Тангуй Ндомбеле ортиқча вазн билан боғлиқ муаммолар туфайли турк клубидан четлатилди. Бу ҳақда Fotospor хабар берди.
Манбага кўра, Чемпионлар лигаси гуруҳ босқичининг "Бавария" билан ўйинидан (1:3) сўнг ярим ҳимоячи меҳмонхонада гамбургер, картошка ва кола буюртма қилган. Ўша пайтда ярим тун эди. "Галатасарой" бош мураббийи Окан Бурук буюртмадан хабар топди ва француз 75 килограммгача вазн йўқотмагунча ва танадаги ёғ даражасини қониқарли даражага келтирмагунча майдонга тушмаслигини айтиб, Ндомбелени танқид қилди.
Қайд этилишича, 1,5 ой ичида 2-3 килограммга озган 26 ёшли футболчи клуб базасида ўзи учун махсус тайёрланган таомларни истеъмол қилган, уйга қайтиши билан эса носоғлом таомлар истеъмол қилган.
"Галатасарой" учун ярим ҳимоячи барча мусобақаларда еттита ўйинда қатнашди.
