Ярим ҳимоячи Орельен Тчуамени шу ёзда «Реал»ни тарк этиши мумкин.

Журналист Рамон Альвареснинг хабар беришича, мадридликлар клубига бош мураббий этиб тайинланишга яқин турган Жозе Моуриньо, агар франциялик футболчи кетишга қарор қилса, раҳбариятдан «Вест Хэм» ярим ҳимоячиси Матеуш Фернандешни сотиб олишни сўраган.

Матеуш Фернандеш 2025 йилда 44 миллион евро эвазига «Саутгемптон»дан «Вест Хэм»га ўтган эди. Унинг Лондон клуби билан шартномаси 2030 йилнинг 30 июнигача мўлжалланган. 2025/26 йилги мавсумда португалиялик футболчи «болғачилар» сафида барча турнирларда 42 та ўйинда майдонга тушиб, 5 та гол урди ва 5 та голли узатмани амалга оширди. Transfermarkt портали Фернандешни 50 миллион еврога баҳоламоқда.