"Майнц" вингери Анвар Эл-Ғози Яқин Шарқдаги можаро ҳақида яна бир пост ёзиб, унда клубнинг 30 октябрь куни футболчи билан вазият бўйича муросага эришилгани ҳақидаги баёнотини рад этди.
Эслатиб ўтамиз, 17 октябрь куни немис клуби нидерландиялик футболчи ўзининг "Инстаграм"даги саҳифасида Фаластинни қўллаб-қувватлаб, “Дарёдан денгизгача” деган иборани ишлатгани учун ўйин ва машғулотлардан четлатган эди.
Икки ҳафта ўтгач, "Майнц" Эл-Ғози ўзини постдан узоқлаштирганини ва жамоа билан ишлашга қайтишини эълон қилди.
"Шубҳага йўл қўймаслик учун: 27 октябрдаги баёнотим (Анвар Фаластин ва Исроилда барча бегуноҳ тинч аҳолининг ўлдирилишини қоралашини ва Яқин Шарқда тинчлик тарафдори эканлигини ёзган - муаллиф) "Майнц" клуби учун ягона ва оммавий якуний баёнот эди.
Менга билдирилган ҳар қандай бошқа баёнотлар, шарҳлар ёки узрлар ҳақиқатга тўғри келмайди ва мен томонидан айтилмаган ёки рухсат этилмаган.
Менинг позициям бу бошланган пайтдагидек қолади:
- Мен уруш ва зўравонликка қаршиман;
- Мен барча бегуноҳ фуқароларнинг ўлдирилишига қаршиман;
- Мен камситишнинг ҳар қандай шаклига қаршиман;
– Мен исломофобияга қаршиман;
- Мен антисемитизмга қаршиман;
– Мен геноцидга қаршиман;
- Апартеидга қарши;
- Мен ишғолга қаршиман;
- Мен зулмга қаршиман.
Мен ўз позициямдан афсусланмайман. Инсоният ва мазлумлар учун сўнгги нафасимгача бугун ва ҳар доим айтганларимдан узоқлашмайман ва шу сўзимда тураман.
Ҳеч бир давлат олдида алоҳида масъулиятим йўқ. Мен бирон бир шахс ёки давлат халқаро ҳуқуқдан устун эканлигига ва уларнинг хатти-ҳаракатлари шубҳа остига олинмаслигига ишонмайман.
Адолат тарафдори бўлиб ҳақиқатни гапиришдан бошқа иложим йўқ, ўзимга, ота-онамга, яқинларимга зарар етказса ҳам шундай қилган бўлардим.
Сўнгги 3 ҳафта ичида Ғазода 3500 дан ортиқ боланинг ўлдирилганини ҳеч қандай оқлаб бўлмайди. Save the Children ташкилотига кўра, Ғазода ҳар 10 дақиқада бир бола ҳалок бўлаётган бўлса, қандай қилиб жим турамиз? Яъни 1 та футбол ўйинида 9 бола ҳалок бўлди. Бу рақам кундан-кунга ортиб бормоқда.
Биз шунчаки жим туролмаймиз. Ғазодаги қотилликларни зудлик билан тўхтатишга чақиришимиз керак!". – деб ёзди Ал-Ғози ўзининг "Твиттер"даги саҳифасида.
