Мадриднинг "Реал" клуби "Сантьяго Бернабеу”ни реконструкция қилиш учун яна кредит олади.

Marca нашри хабарига кўра, янги кредит суммаси 375 миллион евро, муддати 30 йил, йиллик 4,7 фоиз бўлади. Бу маблағлар автотураргоҳларни жиҳозлаш, стадион ва унинг атрофини ободонлаштиришга йўналтирилади. Қўшимча харажатлар ҳам қисман инфляция билан боғлиқ.

Маълум қилинишича, 11 ноябрь куни бўлиб ўтадиган йиллик умумий йиғилишда ўтган молиявий йил ҳисоботлари ва жорий мавсум бюджети тақдим этилади, унда "Реал" директорлар кенгаши янги кредитни тасдиқлашни сўрайди.

"Реал Мадрид" аввалроқ "Сантьяго Бернабеу"ни реконструкция қилиш учун икки марта кредит олган. Кредитларнинг умумий миқдори 800 миллион еврони ташкил этди. Биринчи кредит арена инфратузилмаси билан боғлиқ ишларни молиялаштириш учун 575 миллион евро, иккинчиси майдон учун "иссиқхона" қуришга 225 миллион евро миқдорида олинган.