«Сельта» ҳужумчиси Яго Аспас Ла Лиганинг 12-туридан ўрин олган «Севилья»га (1:1) қарши ўйинда жамоа фойдасига бекор қилинган пенальтига эмоционал тарзда муносабат билдирди.

Учрашувнинг 90+7-дақиқасида бош ҳакам Алехандро Эрнандес Эрнандес Хесус Наваснинг Йорген Ларсенга нисбатан қўполлиги учун «Севилья» дарвозасига пенальти белгилади.

Бироқ, ВАРни бошқарган ҳакам Эдуардо Прьето Иглесиаснинг маслаҳатидан сўнг бош ҳакам эпизоднинг такрорини томоша қилди ва кейин пенальтини бекор қилди.

Бу қарор Аспасга маъқул келмади ва у ғазабланган ҳолда ВАР мониторини ерга улоқтирди.

«Мен ҳамма кўрган нарсани кўрдим. Ўтган ҳафтада «Жирона»да шундай бўлди, бугун ҳам шундай. Ҳар сафар бошимизни кўтарганимизда, улар бизни янада чуқурроқ ерга босишади.

Уларнинг биздан қарздор бўлган барча очколарини инобатга оладиган бўлсак, биз деярли Чемпионлар Лигаси зонасида бўлишимиз керак эди», - деди футболчи ўйиндан сўнг.