"Манчестер Юнайтед" ҳужумни германиялик юлдуз билан кучайтириши мумкин. Бу ҳақда ижтимоий тармоқларда инсайдер Экрем Конур хабар берди.
Манбага кўра, "қизил иблислар"нинг трансферлар рўйхатида "Бавария" ҳужумчиси Лерой Сане бор. Футболчининг Бундеслига чемпиони билан тузилган меҳнат шартномаси 2025 йилнинг ёзига қадар амал қилади.
Эслатиб ўтамиз, Лерой Премьер-лигада ўйнаш тажрибасига эга. 2016 йилдан 2020 йилгача у "Манчестер Сити"да ўйнаган.
Жорий мавсум Германия чемпионатида Сане 11 учрашувда 8 та гол урди ва 6 та голли узатмани амалга оширди. Унинг трансфер нархи 75 миллион евро.
