"Барселона" ҳужумчиси Лионель Месси "Олтин тўп" маросимидан нималар кутаётгани борасида қисқача тўхталиб ўтди.
"2012 йил мен учун энг яхши йил бўлмади — шу сабабли мени шахсий ютуқлардан кўра жамоавий муваффақиятлар кўпроқ қизиқтиради. Бошқа мавсумларда кўпроқ соврин қўлга киритган эдик, шу важдан у йилларни омадли бўлган деб ҳисоблашим мумкин.
Криштиану Роналдуни жаҳоннинг энг яхши футболчиларидан бири деб ҳисобламаслик бемаънилик бўлар эди, лекин мен Хави, Иньеста ва Агуэрога ўз овозимни берардим, чунки улар билан жуда яқинман", – дея Мессининг сўзларини келтиради ESPN.
Қўшимча қилиш жоизки, 2012 йилнинг энг яхши футболчиси унвонига "Барселона"нинг яна бир ўйинчиси Андрес Иньеста ҳам даъвогарлик қилмоқда.
Эслатиб ўтамиз, 2012 йил мобайнида Месси рақиблар дарвозасини 91 бор аниқ нишонга олган ва 1972 йилда ўз клуби ва терма жамоаси сафида 85 гол киритган машҳур немис футболчиси Герд Мюллернинг рекордини янгилаган.
