"Специя" мухлислари норозилик белгиси сифатида клуб базаси яқинида чўчқа калласини қолдириб, "Вақт тугади" ёзуви туширилган баннерни осиб қўйишди. Шунингдек, жамоа ярим ҳимоячиси Даниэле Верденинг машинасига бўёққа бўяб қўйишди.

Мухлислар жамоанинг жорий мавсумдаги натижаларидан норозилигини мана шундай изҳор қилишди. Б Серия ва Италия кубоги доирасидаги 14 учрашувда "Специя" фақат битта ғалабага эришди ва тўғридан-тўғри қуйи лигага тушиб кетиш зонасида бўлган ҳолда турнир жадвалида 18-ўринни эгаллаб турибди. Шу билан бирга, жамоа ўтган мавсум А Сериядан тушиб кетганди.

Олдинроқ "Специя" мухлислари Б Сериянинг охирги ўринларини эгаллаб турган “Тернана” билан дурангдан сўнг жамоага нисбатан хуштакбозлик қилишди. Баъзи мухлислар клуб раҳбарияти билан гаплашиш учун стадионнинг ВИП-трибунасига киришга ҳаракат қилишди.

Намойишдан сўнг клуб бош директори Андреа Гаццоли баёнот бериб, мухлисларнинг хатти-ҳаракатларини қоралади.