“Брентфорд” ҳужумчиси Айван Тони фаолиятини “Челси”да давом эттириши мумкин. Бу ҳақда Football.London нашри хабар бермоқда.

Манбанинг хабарига кўра, Лондон клуби 27 ёшли футболчини қишда сотиб олиш имкониятини жиддий кўриб чиқмоқда. Қайд этилишича, Тонининг ўзи кейинги трансфер ойнасида "Брентфорд"ни тарк этиш ниятида.

Аввалроқ, англиялик футболчининг хизматларига "Арсенал", "Тоттенхэм" ва "Манчестер Юнайтед" клублари ҳам қизиқиш билдираётгани хабар қилинганди. "Брентфорд" раҳбарияти унинг учун 115 миллион евро талаб қилиши кутилмоқда.

Эслатиб ўтамиз, Тони жорий мавсумнинг биринчи қисмини дисквалификация туфайли ўтказиб юбормоқда. Премьер-лиганинг сўнгги мавсумида ҳужумчи 33 та ўйинда майдонга тушиб, 20 та гол урди ва 4 та голга ассистентлик қилди. Transfermarkt портали айни дамда англиялик футболчини 35 миллион еврога баҳоламоқда.