Россия терма жамоасининг собиқ ярим ҳимоячиси Алан Дзагоев фаолиятини якунлаганини эълон қилди.
Бу ҳақда 33 ёшли футболчи сўнгги икки ой давомида ўйнаган Грециянинг "Ламия" клуби сайти хабар берди. Россиялик футболчи сўнгги йилларда олган жароҳатлари туфайли шундай қарорга келган.
"Ламия" бу футболчининг қарорини ҳурмат қилади, унга ҳамкорлиги учун миннатдорчилик билдиради ва ҳаётида омад тилайди!" - дейилади клуб баёнотида.
Дзагоев 28 сентябрь куни "Ламия"га кўчиб ўтди ва мавсум охиригача шартнома имзолади. Ярим ҳимоячи жамоа сафида атиги иккита ўйинда майдонга тушиб, жами 14 дақиқа ўйнади. Алан ЦСКА билан уч карра Россия чемпиони ва тўрт карра Россия кубогини қўлга киритган.
