Ҳуқуқлари Саудия Арабистонининг “Ал-Ҳилол” клубига тегишли бўлган португалиялик ярим ҳимоячи Рубен Невеш Англия Премьер-лигасига қайтиши мумкин. Бу ҳақда Football Insider хабар бермоқда.

Журналистларнинг ёзишича, ярим ҳимоячининг хизматларига “Манчестер Сити” ва “Ньюкасл” клублари қизиқиш билдирмоқда. Иккала клуб ҳам футболчини январдаги трансфер ойнасида ўз сафига қўшиб олмоқчи. Шу билан бирга, "Ал-Ҳилол" Невешни ҳеч бўлмаганда жорий мавсум охиригача сақлаб қолишни режалаштирмоқда.

Рубен охирги трансфер ойнасида Саудия клубига "Вулверхэмптон"дан ўтган эди. Битим суммаси 55 миллион еврони ташкил этди. Жорий мавсумда ярим ҳимоячи 17 та ўйинда майдонга тушиб, 2 та гол ва битта голли узатмани амалга оширди.